72% landsmanna telja íslenska kvótakerfið betra en í öðrum löndum

Yfir sjötíu prósent landsmanna telja að kvótakerfi fiskveiða á Íslandi sé almennt betra en gerist í öðrum löndum. Þetta kemur fram í skoðanakönnun sem MMR gerði fyrir Landssamband íslenskra útvegsmanna.

Hörð átök geisa þessa dagana á Alþingi Íslendinga um skipan sjávarútvegsmála. Svo mikið er víst, landsmenn eru nokkuð sammála um að atvinnugreinin sé mikilvæg fyrir íslenskt efnahagslíf, miðað við könnun MMR fyrir útvegsmenn.

856 manns tóku afstöðu til spurningar um mikilvægi sjávarútvegs og sögðust aðeins 3,1 prósent ekki telja sjávarútveginn mikilvægan, meðan 34,5 prósent sögðu hann mikilvægan og 62,4 prósent sögðu hann einstaklega mikilvægan.

LÍÚ lét einnig kanna hvernig landsmenn mætu íslenska kvótakerfið í samanburði við önnur lönd og var spurningin svohljóðandi: Telur þú að stjórnkerfi fiskveiða á Íslandi sé almennt betra, eins eða lakara en gerist í öðrum löndum?

655 manns tóku afstöðu, og af þeim töldu 17,1 prósent að íslenska kerfið væri lakara, 11,2 prósent að það væri alveg eins, en yfirgnæfandi meirihluti, eða 71,7 prósent, töldu íslenska kerfið ýmist heldur betra eða mun betra en gerðist í öðrum löndum.