Greiða 300 þúsund í ferðakostnað vegna tæknifrjóvgana

Tæknifrjóvganir eru ekki á færi allra vegna kostnaðar. Þetta segir einn þeirra sem hefur farið í gegnum slíkar meðferðir en ofan á kostnað við meðferðirnar hefur hann þurft að greiða 300 þúsund krónur í ferðakostnað þar sem þau hjónin eru búsett á Akureyri.

Glasafrjóvgunum fer fækkandi hér á landi og nær enginn biðlisti er eftir því að komast í meðferð en fyrir ári var hann fjórir mánuðir. Þórðir Óskarsson læknir hjá ART Medica, sem sér um meðferðirnar, sagði í fréttum okkar í gær marga setja fyrir sig aukinn kostnað eftir að dregið var úr niðurgreiðslu ríksins á meðferðum í byrjun ársins.

Á meðal  þess sem breyttist var að alveg var hætt að aðstoða þá sem eiga barn fyrir og ferðakostnaður er aðeins niðurgreiddur hjá barnlausu fólki sem kemur í aðra, þriðju og fjórðu meðferð.

Þetta hefur mikil áhrif á þá sem búsettir eru utan höfuðborgarinnar. Rúnar Gunnarsson og kona hans eru ein þeirra sem hafa farið tæknifrjóvganir í ár en þau búa á Akureyri og eiga eina dóttur.

„Við erum búin að fara núna í þrjár meðferðir og þurfum að halda áfram núna eftir áramótin og þetta hefur kostað okkur töluverða fjármuni," segir Rúnar.

Rúnar segir kostnað við sjálfar meðferðirnar vera allt frá um fimmtíu þúsund krónum upp í hátt í fjögur hundruð þúsund. Ofan á það leggist svo ferðakostnaður en á árinu hafa þau eytt um þrjú hundruð þúsund í ferðir til Reykjavíkur.

„Við hverja meðferð þá eru farnar nokkrar ferðir til Reykjavíkur með litlum fyrirvara því þarf oft að panta flug með skömmum fyrirvara til þess að komast á réttum tíma eða þá að dveljast langdvölum í Reykjavík og það er náttúrulega tilheyrand vinnutap og annar kostnaður sem hlýst af því."

Hann segir marga þurfa að fara í þrjár til sex meðferðir áður en þær skila árangri og því geti kostnaðurinn í sumum tilfellum hlaupið á milljónum.

„Fjárhæðirnar eru gríðarlegar þannig að þetta er ekkert á færi allra."

Þau hjónin eiga bókað í glasameðferð eftir áramótin en Rúnar segir þau hafa velt því fyrir sér að fresta henni vegna kostnaðar.

„Núna leggjast fjárhagsáhyggjur ofan á aðra streitu sem tengist ófrjósemi það er náttúrulega ekki til þess að bæta það eða hjálpa fólki".