Ljósin tendruð á Óslóartrénu

Ljósin verða tendruð á Óslóartrénu á Austurvelli klukkan fjögur í dag. Rúm sextíu ár eru síðan að íbúar Óslóar færðu Reykvíkingum fyrsta grenitréð að gjöf og hefur það ávallt átt sinn stað á Austurvelli. Það verður sex ára gamall norsk-íslenskur piltur, Jörundur Ísak Stefánsson, sem fær þann heiður að tendra ljósin.

Tréð verður fagurskreytt ljósum en að auki mun Stúfur, jólaórói Styrktarfélags lamaðra og fatlaðra 2012 prýða tréð. Stúfur er sjöundi óróinn í jólasveinaseríu Styrktarfélagsins en fyrri óróar þess hafa prýtt tréð síðustu ár.

Stúfur er gerður í takmörkuðu upplagi og seldur dagana 5. til 19. desember í Casa, Epal, Kraum, Kokku, Líf og List, Módern, Þjóðminjasafninu, Blómavali um allt land, Blóma og gjafabúðinni Sauðárkróki, Norska húsinu Stykkishólmi, Póley Vestmannaeyjum og Valrós Akureyri.

Markmiðið með gerð og sölu Stúfs er að auðga líf fatlaðra barna og ungmenna. Allur ágóði rennur til Æfingarstöðvar Styrktarfélags lamaðra og fatlaðra en þar fer fram umfangmesta sjúkra- og iðjuþjálfun á landinu.