Öryggismál hjá Samskipun í endurskoðun

Öryggismál hjá Samskipum eru í endurskoðun eftir að tveimur ungum hælisleitendum tókst að laumast um borð í flutningaskipið Helgafell og sigla til Englands. Ekki er ljóst hvort Samskip verði sektað af yfirvöldum þar ytra.

Við sögðum frá því í fyrir helgi að þeim Adam Aamer og Alhawari Agukourchi, sem voru handteknir þar sem þeir reyndu að smygla sér um borð í þotu Icelandair á Keflavíkurflugvelli í júlí, hefði tekist að flýja land sitt skömmu síðar og því væri ákæra gegn þeim í uppnámi. Mönnunum tókst að smygla sér um borð í flutningaskip Samskipa, Ms Helgafell, sem var á leið til Evrópu og þeir komu ekki í leitirnar fyrr en við komuna til Immingham þar sem þarlend lögregluyfirvöld handtóku þá.

Anna Guðný Aradóttir upplýsingafulltrúi Samskipa, segir að í kjölfarið af þessum atburði hafi verið ákveðið að taka öryggismálin á svæði Samskipa í Sundahöfn í endurskoðun enda taki fyrirtækið uppákomu sem þessa mjög alvarlega. Að sögn Önnu Guðnýjar er ekki ljóst hvort málið hafi einhverjar afleiðingar fyrir Samskip á Englandi, en hún segir að sér sé ekki kunnugt um hvort sekt vegna þessa hafi borist.

Í viðtali við fréttastofu skömmu eftir flóttatilraunina í júlí sögðust mennirnir oftsinnis hafa gert misheppnaðar tilraunir til að komast úr landi með þessum hætti. Þetta mun þó vera í fyrsta sinn sem laumufarþegum tekst að komast úr landi með skipum Samskipa en Anna Guðný segir að á síðustu árum hafi öryggisgæsla verið efld gríðarlega á svæðinu með tilheyrandi kostnaði en í ljósi þess að mönnunum hafi tekist ætlunarverk sitt hafi verið ákveðið að fara á ný yfir öryggisreglurnar.

Eins og áður sagði voru tvímenningarnir handteknir af lögreglu í Immingham og samkvæmt ríkislögreglustjóra hafa engar frekari upplýsingar borist frá breskum yfirvöldum vegna málsins. Ríkissaksóknari hafði birt ákært mennina fyrir að fara um borð í þotuna og fyrir að brjótast inn á flugvallarsvæðið en þegar upp komst um að þeir hefðu flúið land var málið endursent úr dómi og er það nú í bið. Samkvæmt upplýsingum frá saksóknara hefur ekki verið ákveðið hvort ákæran gegn þeim verði send til meðferðar í Englandi, en slíkt kemur til greina.