Augljóslega ósammála niðurstöðunni

„Það er búið að kæra þetta þannig að við erum augljóslega ósammála niðurstöðunni," segir Björn Þorvaldsson, saksóknari hjá sérstökum saksóknara. Héraðsdómur Reykjavíkur vísaði í dag frá ákæru á hendur Magnúsi Guðmundssyni, fyrrverandi forstjóra Kaupþings í Lúxemborg, og að hluta ákæru gegn Ólafi Ólafssyni, einum aðaleiganda Kaupþings.

Björn vildi að öðru leyti ekki tjá sig um niðurstöðuna. Fram kemur í úrskurði Héraðsdóms Reykjavíkur, sem fréttastofan hefur undir höndum, að ákæran á hendur honum sé svo óskýr og vanreifuð að vísa beri henni frá dómi. Í sakamálalögum segir að í ákæru skuli greina „svo glöggt sem verða má" hver sú háttsemi er sem ákært er út af. Í úrskurði segir: „Ákvæði þessu er ætlað að tryggja það að dómari þurfi ekki að velkjast í vafa um hvað sakborningi sé gefið að sök og ennfremur það að sakborningur geti varist ákærunni."

Hluta ákæru á hendur Ólafi Ólafssyni, sem var annar stærsti hluthafi Kaupþings, í Al-Thani-málinu er einnig vísað frá. Þar er um að ræða ákærulið vegna hlutdeildar í meintri markaðsmisnotkun Hreiðars Más Sigurðssonar og Sigurðar Einarssonar. Ákæru vegna hlutdeildar í meintum umboðssvikum ekki vísað frá og því er enginn úrskurður um málskostnað Ólafs.