Aðkoma Ólafs "óljós“ og "óþarflega flókin“ í ákæru

Hluta ákæru á hendur Ólafi Ólafssyni, sem var annar stærsti hluthafi Kaupþings, í Al-Thani-málinu er einnig vísað frá, en um er að ræða ákærulið vegna hlutdeildar í meintri markaðsmisnotkun Hreiðars Más Sigurðssonar og Sigurðar Einarssonar.

Ákæru vegna hlutdeildar í meintum umboðssvikum er ekki vísað frá og því er enginn úrskurður um málskostnað Ólafs.

Málið snýst um lánveitingu Kaupþings til sjeiks Al-Thani vegna kaupa á hlutabréfum hans í Kaupþingi hinn 22. september 2008.

Eins og fréttastofa greindi frá í morgun var öllum ákæruliðum á hendur Magnúsi Guðmundssyni vísað frá. Þá þarf íslenska ríkið að greiða Magnúsi rúmlega níu milljónir króna í málskostnað. Úrskurðurinn hefur verið kærður til Hæstaréttar.

Í b-lið III. kafla ákærunnar voru þeir Magnús og Ólafur ákærðir fyrir hlutdeild í markaðsmisnotkun. Í úrskurði héraðsdóms segir: "Ákæruliður þessi getur ekki talist vera skýr um verknað ákærða Magnúsar og er hlutur (hans) þar skilgreindur með mjög almennum hætti. (...) Hið sama er að segja um skilgreiningu á verknaði ákærða Ólafs, sem telja verður afar óljósa en jafnframt óþarflega flókna: "að gera hlutabréfaviðskiptin að veruleika með aðkomu að fjármögnun þeirra," en þar er vísað almennt til II. kafla ákærunar. (...) sérstaklega er orðið "aðkoma" svo óljósrar merkingar að það verður að telja ótækt í ákæru." Var ákæruliðnum því vísað frá dómi.

Ragnar H. Hall, verjandi Ólafs Ólafssonar, vildi lítið tjá sig um niðurstöðuna þar sem úrskurðurinn hefur verið kærður til Hæstaréttar. „Það er búið að kæra þetta til Hæstaréttar og þar fær þetta sína venjulegu meðhöndlun," segir Ragnar.