Færeyingar gætu orðið fimmfalt ríkari en Norðmenn

Statoil-menn segjast ætla að halda áfram olíuborun við Færeyjar næsta vor. Þetta kemur fram í fréttaskýringu á norska olíuvefmiðlinum Offshore.no þar sem bent er á að olíufundur myndi umbylta færeysku samfélagi. Jafnframt kemur fram hversvegna leitin í Færeyjum geti haft áhrif á olíuleit við Ísland.

Statoil og samstarfsaðilar þess, Exxon Mobil og Atlantic Petroleum, greindu frá því í morgun að hlé hafi verið gert á borunum. „Verða að bíða eftir lóttódrættinum" er fyrirsögn greinarinnar og þar er Færeyingum bent á að vera þolinmóðir. Brugdan-borsvæðið kunni nefnilega að breyta öllu samfélaginu.

Ef olíufundurinn verði á stærð við Skrugard-olíulindina í Barentshafi, upp á allt að 500 milljónir tunna af olíu, þá breytist færeyska hagkerfið í grundvallaratriðum. Með olíuverði upp á 100 bandaríkjadali á tunnu þýddi slík uppgötvun 130 milljóna króna tekjur á mann í Færeyjum. Færeyska skattalöggjöfin geri ráð fyrir allt að 57 prósenta skattheimtu af olíuvinnslu. Lauslegt mat þýddi 75 milljóna króna skatttekjur á hvern hinna 48.574 íbúa Færeyja. Það væri fimm sinnum meira en norski olíusjóðurinn gæfi á hvern Norðmann.

Statoil-menn segjast ætla að snúa aftur þegar veðrið skánar. „Við áætlum að koma aftur í vor eða sumar til að ljúka boruninni. Þar að auki höfum við skuldbundið okkur til að bora aðra holu árið 2014," segir Bard Glad Pedersen, yfirmaður hjá Statoil í viðtali við vefmiðilinn.

Fram kemur að borinn sé kominn niður í djúp hraunlög en hlé hafi verið gert á verkinu þar sem búast megi við misjöfnum veðrum á svæðinu í vetur. Þetta sé hins vegar talið spennandi svæði sem gefi tækifæri á stórum olíufundi. „En það er líka jarðfræðilega krefjandi," segir Glad Pedersen.

Í greininni er lýst því mati að olíuleitin við Færeyjar geti haft áhrif á framvindu olíuleitar í vestanverðu Noregshafi og við Ísland. Færeyska landgrunnið sé mikil áskorun vegna erfiðs hraunlagastafla sem er allt að tvöþúsund metra þykkur. Hefðbundnar hljóðbylgju- og rafsegulmælingar gefi því ekki sömu svör og á hefðbundnum leitarsvæðum.

„Þetta þýðir að þú ert meira í myrkrinu á færeysku hafsvæði en öðrum stöðum. Þetta er einnig raunin í vestanverðu Noregshafi, þar sem olíurisarnir Chevron og Exxon Mobil hafa tryggt sér risastór leitarsvæði," segir í greininni.

Vitnað er í Sissel Eriksen, rannsóknarstjóra Olíustofnunar Noregs, sem sagði fyrr á árinu að ný þekking sem fengist myndi nýtast þvert á landamæri. Það væri tímafrekt og erfitt að fara í gegnum hraunlögin en hún kvaðst sannfærð um að olíufélögin myndu leysa það á farsælan hátt.

„Það sem gerist lengra vestur í Atlantshafi, vestur af Hjaltlandi, í Færeyjum og á Íslandi, getur haft áhrif á framvinduna. Þetta eru samskonar jarðlög og mikið til sömu olíufélögin, sem munu vilja nýta nýja þekkingu þvert yfir landamæri," sagði Sissel Eriksen.