Alger viðsnúningur hjá Orkuveitunni og jákvæð teikn á lofti

Árangur í rekstri Orkuveitu Reykjavíkur hefur styrkt verulega getu fyrirtækisins til að greiða af þeim miklu skuldum sem á rekstrinum hvíla, en fyrstu níu mánuði ársins var rekstrarhagnaður fyrirtækisins 11 milljarðar króna. Sú leið Besta flokksins að aftengja afskipti stjórnmálamanna af fyrirtækinu virðist því hafa heppnast afar vel.

Eftir að Besti flokkurinn komst til valda í borgarstjórn Reykjavíkur í meirihlutasamstarfi við Samfylkinguna var strax ráðist í aðgerðir til að bregðast við fjárhagsvanda Orkuveitunnar.

Besti flokkurinn gerði það sem skilyrði að fá ópólitískt fagfólk að rekstri fyrirtækisins. Í raun kvað við nýjan tón, enda höfðu stjórnmálamenn haft afskipti af því árum saman, eitthvað sem var harkalega gagnrýnt í skýrslu sérstakrar úttektarnefndar Orkuveitunnar sem kom út fyrr í haust.

Árangurinn lætur ekki á sér standa. Á fyrstu níu mánuðum þessa árs var rekstrarhagnaður Orkuveitunnar 11 milljarðar króna. Framlegð rekstrar er 17,8 milljarðar og hlutfall milli framlegðar frá rekstri og skulda er nú svipað og fyrir hrun haustið 2008.

Aðgerðaáætlun Orkuveitu Reykjavíkur og eigenda, „Planið" svokallaða, var samþykkt vorið 2011 og felur í sér margvíslegar aðgerðir sem miða að því að bæta sjóðstöðu fyrirtækisins um 50 milljarða króna þangað til í lok árs 2016. Að loknum fyrstu níu mánuðum ársins 2012 er árangurinn um 1,2 milljörðum króna betri en gert er ráð fyrir í Planinu.

Haraldur Flosi Tryggvason, stjórnarformaður Orkuveitunnar, segir að margt skýri þennan árangur.

„Pólitískt er það að hafa tekið ákvörðun um að standa við þær ákvarðanir sem þurfti að ráðast í. Rekstrarlega er það sú staðreynd að Bjarni Bjarnason og hans fólk hafa náð ótrúlega föstum tökum á rekstrinum á skömmum tíma. Þetta hefur hjálpað til þess að ná trausti lánardrottna og þeirra fjármálastofnana sem eru að vinna með okkur," segir Haraldur Flosi.

Verður áfram ríkur skilningur hjá eiganda fyrirtækisins (Rvk. og fleiri sveitarfélög) um mikilvægi þess að láta það í friði? „Eftir því sem ég best veit þá verður það þannig. Eigendur hafa staðið sig vel, vil ég segja, í því að leyfa fyrirtækinu að reka sig á fjárhagslegum forsendum núna."

Unnið að formúlu um arðgreiðslur

Haraldur Flosi segir Planið hafa hjálpað, enda eigi það að gilda um fimm ára skeið. „Það hjálpar mönnum að halda fókusnum á það sem skiptir máli," segir hann.

Unnið er að uppsetningu á formúlu í eigendastefnu Orkuveitunnar um hvernig fara skuli með arðgreiðslur ef aðstæður leyfa. „Það á að tryggja að arðgreiðslur eigi sér ekki stað nema það séu fjárhagslegar forsendur fyrir útgreiðslu þeirra," segir Haraldur Flosi.

Arðgreiðslur án þess að fyrir hendi væru fjárhagslegar forsendur var gagnrýnt í skýrslu úttektarnefndar Orkuveitunnar frá þeim tíma sem flokkarnir fjórir skiptust á að halda um valdataumana a þessu þjónustufyrirtæki Reykjavíkur og nágrennis. thorbjorn@stod2.is