Veðurstofan ætlar að spá fyrir um norðurljós á landinu

Á kynningarfundi Ísland – allt árið, sem fram fer síðar í dag, mun Ráðherra umhverfis- og auðlinda opna nýjan hluta á vef veðurstofunnar þar sem hægt verður að nálgast spá veðurfræðings um hvar er líklegast að sjáist til norðurljósa á landinu. Þetta er því ný þjónusta við notendur vefsins sem hingað til hafa treyst á skarpskyggni veðurfræðinga sem spá fyrir um veður.

Til að unnt sé að sjá norðurljós á Íslandi þá þarf þrennt að koma til:

1. að það sé nægjanleg virkni.

2. að það sé myrkur - tunglstaða hefur þarna áhrif.

3. að það sé þokkalega heiðskýrt.

Í spá veðurstofunnar, sem birt verður á vedur.is verða birtar upplýsingar upplýsingar um þessa þætti og mun veðurfræðingur á vakt skrifa textaspá og leggja mat á hvar líklegt sé að sjáist til norðurljósa miðað við skýjafar og virkni.

Að sögn Ingvars Kristinssonar hjá Veðurstofu Íslands er norðurljósaspá Veðurstofunnar sú fyrsta sinnar tegundar í heiminum, en ekki hefur áður verið reynt að spá fyrir um líkur á að sjáist til norðurljósa miðað við staðsetningu með tilliti til skýjafars og virkni.

Kynningarfundur Ísland – allt árið, hefst klukkan eitt í dag á Grand Hótel.