Undirbúningsnám í flugumferðarstjórn í óvissu

Flugakademía Keilis á Keflavíkurflugvelli verður fyrir mörg hundruð þúsund króna tekjutapi þegar lokað er fyrir æfinga- og kennsluflug vegna manneklu í flugturninum, segir skólastjórinn. Hann segir að fleiri flugumferðarstjóra vanti en Isavia hefur beðið Keili um að hætta að þjálfa nemendur í undirbúningsnámi í flugumferðarstjórn.

Allt æfinga- og kennsluflug var bannað á Keflavíkurflugvelli í gær vegna þess að ekki tókst að manna vakt flugumferðastjóra með skömmum fyrirvara og voru því einungis þrír flugumferðarstjórar á vakt en ekki fimm eins og krafist er á þessum árstíma.

„Við erum staðsettir á Keflavíkurflugvelli og í gær þýddi það að okkar vélar voru fastar á vellinum, gátu ekki farið í æfingarflug, ekki yfirgefið völlinn til að fara annað," segir Kári Kárason, skólastjóri Flugakademíu Keilis.

Þetta er í þriðja skipti á fjórum vikum sem þetta gerist að sögn Kára og er það mikið högg fyrir rekstur skólans.

„Tapið fyrir okkur er komið vel á aðra milljón króna. Til að setja þetta í samhengi við rekstur hjá flugfélögum, þó svo að þau hafi ekki orðið fyrir skerðingu í þessu tilfelli, þá myndi þetta þýða sambærilegt tap fyrir Icelandair uppá 750 milljónir króna á einum degi."

Samkvæmt upplýsingum frá Isavia er þjónusta flugumferðarstjóra fjármögnuð með notendagjöldum en kennslu og æfingaflug er undanþegið slíkum gjöldum. Þar af leiðandi er það flug fellt niður þegar upp kemur mannekla eins og í gær en ekki kallaður út auka mannskapur til þess að sinna æfingarflugi á kostnað greiðandi aðila.

„Ég skil að það sé svo en ég held að það eigi ekki að mismuna fólki eftir hversu há gjöld þeir greiða því þá myndu menn bara leyfa stærstu flugvélunum að lenda en ekki hinum af því þeir borguðu minna."

Flugakademía Keilis stendur að undirbúningsnámi í flugumferðarstjórn en samkvæmt tölum frá Isavia hafa alls 82 lokið grunnámi í flugumferðarstjórn hjá Keili og Flugskóla Íslands hér á landi frá árinu 2009 en einungis 27 verið teknir í framhaldsnám hjá Isavia.