Mögulega salmonella í kjúklingi frá Matfugli

Komið hefur upp grunur um salmonellusmit í ferskum kjúklingi framleiddum af Matfugli ehf. Frekari rannsókna er þörf til þess að staðfesta gruninn en þangað til þykir fyrirtækinu rétt að innkalla vöruna.

Um er að ræða kjúkling með rekjanleikanúmerinu (Rlnr.) 011-12-31-3-24.

Dreifing á afurðum hefur verið stöðvuð.

Hafi fólk ferska kjúklinga heima hjá sér er það beðið um að gæta að rekjanleikanúmerinu, sem er að finna á umbúðunum, og skila kjúklingnum í viðkomandi verslun eða beint til Matfugls ehf., Völuteigi 2, Mosfellsbæ.

Í tilkynningu frá Matfugli kemur fram að til að varast óróleika hjá neytendum sé það tekið fram að þessi kjúklingur er hættulaus fari neytendur eftir leiðbeiningum um eldun kjúklinga, steiki í gegn og passi að blóðvökvi fari ekki í aðra vöru.

Innköllunin á eingöngu við um kjúkling með þessu tiltekna rekjanleikanúmeri.