Flestar kindurnar sem hafa fundist eru á lífi

Gleðifréttir berast að norðan því meiri hluti fjárins sem fundist hefur í dag og kvöld er á lífi. Ekki finnst mikið dauðu fé, samkvæmt upplýsingum frá Slysavarnarfélaginu Landsbjörg.

Búist er við að 250 björgunarsveitarmenn verði við störf á morgun. Búið er að flytja mikið af björgunartækjum, snjósleðum, snjóbílum, jeppum, fjórhjólum og kerrum, á Norðausturland.

Þrátt fyrir að vandinn sé mestur á Norðausturlandi hefur víða verið að fenntu fé í dag. Til dæmis á Norðvesturlandi; í Heiðarbæ, Kolbeinsdal, Unadal, Víðimýrardal, Ólafsfirði, Gautsdal og Harmaheiði.

Björgunarsveitarmenn hafa gert hraðleit á Þeistareykjasvæðinu. Þar hefur töluverður fjöldi kinda fundist og verið grafinn upp. Samkvæmt tilkynningu frá Landsbjög er nokkrum vandkvæðum bundið að koma fénu af staðnum þar sem svæðið er torfært.

Um 200 kindur voru fluttar niður af Reykjaheiði í dag. Þá er búið að leita á Vaðlaheiði og Bárðardal.