Þriggja ára fangelsi fyrir hrottalega árás í Breiðholti

Mennirnir sem réðust á mann á sjötugsaldri í Breiðholti í júlí og héldu honum klukkutímum saman á hemili hans og hótuðu honum ofbeldi voru dæmdir í fangelsi í Héraðsdómi Reykjavíkur í dag. Annar þeirra, Daniel Arciszewski, var dæmdur í þriggja ára fangelsi en hinn, Snorri Sturluson, í tveggja ára fangelsi. Mennirnir voru ákærðir fyrir að beita manninn ofbeldi og meiða hann. Þeir neyddu hann líka til að millifæra hundruð þúsunda á bankareikning sinn.

Fram kemur í dómnum að ákærðu játuðu báðir fyrir dómi að hafa svipt manninn frelsi og rænt hann. Þeir neituðu báðir að hafa beitt eins miklu ofbeldi og lýst var í ákærunni. Daníel neitaði að hafa beitt byssu, eins og fram hafði komið í ákæru. Hann neitaði líka að hafa beitt staf til að ráðast á manninn með. Snorri sagðist ekki hafa hótað manninum lífláti og líkamsmeiðingum. Þá sagðist hann ekki hafa slegið manninn eða bundið hann niður í stól með límbandi. Snorri sagði jafnframt að þeir hefðu byrjað árásina klukkan fimm um nóttina en ekki klukkan þrjú eins og kom fram í ákærunni.

Þrátt fyrir þessa fyrirvara ákærðu við verknaðarlýsingu voru dómari, verjandi og saksóknari sammála um að fram væri komin játning brota. Taldi sækjandi ekki þörf á að leiða vitni. Því miðar dómarinn við játningu ákærðu um verknaðarlýsinguna.

Eins og fram hefur komið héldu mennirnir fórnarlambinu þar til klukkan ellefu daginn eftir, þegar vinnufélagar hans fóru að óttast um hann og vitjuðu hans á heimili hans.

Auk þessa dóms var Daníel dæmdur fyrir fjölmörg fíkniefna og umferðarlagabrot. Hann var sviptur ökuleyfi ævilangt. Snorri á líka margra ára brotasögu að baki.

Mennirnir voru að auki dæmdir til að greiða fórnarlambinu 1.265 þúsund krónur auk vaxta í skaðabætur.