Fylkiskonur féllu ásamt KR | Úrslit dagsins í Pepsi-deild kvenna

Fylkir leikur í 1. deild kvenna á næstu leiktíð. Þetta varð ljóst eftir 2-1 tap liðsins gegn Þór/KA á Árbæjarvelli í dag. ÍBV tryggði sér annað sæti deildarinnar með betri markatölu en Stjarnan.

Heimakonur í Árbænum þurftu einnig að treysta á Valssigur gegn Aftureldingu í Mosfellsbænum en ætluðu engu að síður að selja sig dýrt á Árbæjarvelli. Eftir þunga sókn gestanna fékk Anna Björn Björnsdóttir frábæra sendingu inn fyrir vörn Þórs/KA og kláraði færið vel. Heimakonur komnar yfir og fyrri hálfleikur hálfnaður.

Markið virtist setja gestina útaf laginu og hvorugt lið skapaði sér umtalsverð færi það sem eftir lifði fyrri hálfleiks.

Jafnfræði var með liðunum framan af síðari hálfleik. Á 62. mínútu fékk Kayle Grimsley fullmikinn tíma til að athafna sig utan við teig Fylkiskvenna. Sending hennar hafnaði hjá Söndru Maríu Jessen sem kláraði færið vel.

Fylkiskonur vissu að ekkert nema sigur væri nóg og blésu til sóknar. Stundarfjórðungi fyrir leikslok töldu þær Önnu Björgu vera sloppna eina í gegn og voru afar ósáttar þegar aðstoðardómari gaf merki um rangstöðu. Þær virtust ennþá pirraður á þeirri ákvörðun þegar sending utan af kanti hafnaði hjá Tahnai Annis inni á vítateig. Sú bandaríska var ekkert að flækja hlutina heldur sendi boltann á lofti í bláhornið. Stórkostlegt mark.

Þegar öllu var á botninn hvolft skiptu úrslitin á Árbæjarvelli Fylkiskonur engu máli. Afturelding náði í stig í Mosfellsbænum gegn Valskonum svo sigur hefði ekki dugað Fylki.

Árbæingar eiga hrós skilið fyrir leik sinn í dag. Liðið barðist um alla bolta og átti fína spilkafla. Hefði liðið spilað svona í allt sumar er ljóst að félagið væri ekki á leið í næstefstu deild.

Önnur úrslit

Afturelding 4-4 Valur

1-0 Carla Lee (2.), 1-1 Elín Metta Jensen (28.), 2-1 Carla Lee (31.), 3-1 Lára Kristín Pedersen (41.), 3-2 Elín Metta Jensen (61.), 4-2 Sigríður Þóra Birgisdóttir (70.), 4-3 Svana Rún Hermannsdóttir (85.), 4-4 Rakel Logadóttir (90.)

Selfoss 1-4 Stjarnan

1-0 Thelma Sif Kristjánsdóttir (33.), 1-1 Inga Birna Friðjónsdóttir (54.), 1-2 Harpa Þorsteinsdóttir (70.), 1-3 Helga Franklínsdóttir (82.), 1-4 Harpa Þorsteinsdóttir (83.)

Breiðablik 1-1 FH

1-0 Þórdís Hrönn Sigfúsdóttir, 1-1 Hugrún Elvarsdóttir (12.)

ÍBV 8-0 KR

1-0 Vesna Smiljkovic (7.). 2-0 Kristín Erna Sigurlásdóttir (39.), 3-0 Danka Podovac (41.), Vesna Smiljkovic (55.), 5-0 Shaneka Gordon (64.), 6-0 Danka Podovac (77.), 7-0 Shaneka Gordon (86.), Danka Podovac (88.)

Lokastöðuna í Pepsi-deild kvenna má sjá hér.