Ryan Lochte viðurkennir að hafa pissað í Ólympíulaugina í London

Bandaríski sundmaðurinn Ryan Lochte viðurkenndi í útvarpsviðtali hjá Ryan Seacrest að hann hafi freistast til að pissa í laugina á Ólympíuleikunum í London. Ryan Lochte keppti í mörgum greinum á leikunum og oft var stutt á milli hjá honum. Uppskera Lochte á leikunum var tvö gull, tvö silfur og eitt brons og hann hefur nú alls unnið til ellefu verðlauna á Ólympíuleikum.

Ryan Seacrest spurði hann hreint úr hvort að hann hafi pissað í Ólympíulaugina á meðan leikunum stóð. „Auðvitað gerði ég það. Það er bara eitthvað við það að fara ofan í klórlaug sem fær þig til að vera mál. Ég pissaði aldrei á meðan keppninni stóð en það kom fyrir í upphituninni," sagði Ryan Lochte sem er orðinn 28 ára gamall.

„Ég er feginn að leikarnir eru að baki. Síðustu þrjú til fjögur ár hafa verið mjög erfið og ég er búinn að fá nóg. Ég er mjög ánægður að fá loksins tækifæri til að anda," sagði Lochte.

Ryan Lochte var í keppni við landa sinn Michael Phelps sem vann sín 18. gullverðlaun og 22. Ólympíuverðlaun á leikunum í London. Þeir hafa unnið nokkur gull saman í boðsundunum.

„Michael Phelp er einn af mestu keppnismönnum sem ég hef lent upp á móti og veistu hvað? Hann er góður vinur. Við verðum alltaf félagar hvernig sem fer hjá okkur og þrátt fyrir að við viljum báðir vinna," sagði Ryan Lochte.