Villas-Boas ósáttur við Modric

Líkurnar á því að Luka Modric hafi leikið sinn síðasta leik fyrir Tottenham halda áfram að aukast. André Villas-Boas, stjóri Tottenham, hefur gagnrýnt Modric harðlega fyrir að ferðast ekki með liðinu til Bandaríkjanna þar sem liðið er í æfingaferð.

Modric reyndi að hætta hjá Spurs síðastliðið sumar þegar Chelsea var á höttunum eftir honum. Nú virðist hann ætla að reyna til þrautar að fá félagaskipti til spænsku meistaranna Real Madrid.

Í spænskum fjölmiðlum er haft eftir Villas-Boas að hann sé mjög ósáttur við að Modric kom ekki til Bandaríkjanna.

„Modric hefur rangt við. Þetta vinnur gegn honum. Hann gefur gert vandamálið stærra með gjörðum sínum og stjórnarformaðurinn (Daniel Levy) er mjög reiður," er haft eftir portúgalska stjóranum.

„Þetta er heldur ekki góður tími fyrir Levy sem er í Bandaríkjunum vegna veikinda eiginkonu sinnar," sagði Villas-Boas.

Portúgalinn hrósar þó króatíska miðjumanninum í hástert.

„Hann er góður, mjög góður. Ég reyndi að fá hann til Chelsea síðastliðið sumar. Það verður mikil eftirsjá af honum. Hann er leikmaður sem getur breytt leikjum uppá sitt einsdæmi, gerir leik liðs skilvirkari þegar þessa þarf og getur leyst nokkrar stöður á vellinum af hendi," sagði Villas-Boas.