Engar líkur að falsaðir seðlar séu í kössunum

Katrín Theodórsdóttir, formaður yfirkjörsóknar í Reykjavíkurkjördæmi norður, segir hverfandi líkur á því að fölsuð atkvæði hafi komist í kjörkassana í forsetakosningunum í dag.

Fyrr í kvöld bárust fregnir af því að menn væru að dreifa kjörseðlum fyrir utan Ráðhúsið og hvetja fólk til þess að lauma fleiri en einum kjörseðli í kjörkassana. Að sögn Katrínar fór lögreglan í málið en ekkert kom í ljós.

Katrín segir að ekki sé fræðilegur möguleiki að neinum hafi tekist að ræna kjörseðlum af kjörstjórninni. Ef einhverjir hefðu hins vegar falsað kjörseðlana þá hefði það ekki farið framhjá kjörstjórninni við talningu. Því eru mjög litlar líkur á að fölsuð atkvæði hafi spillt kosningunum í Reykjavík.

„Þetta var því bara stormur í vatnsglasi held ég," segir Katrín.

Nú þegar hafa öll atkvæði verið talin í kjördæminu. Þar greiddu rétt yfir 30 þúsund manns atkvæði eða 67%. Það er fremur dræm kjörsókn. Í síðustu forsetakosningum var kjörsókn reyndar 63% en venjulega er hún töluvert hærri.