Lögreglan rannsakar kjörseðlamál

Formaður yfirkjörstjórnar í Reykjavik norður hefur óskað eftir því að lögreglan rannsaki hvað veldur því að ungir menn stóðu í miðborg Reykjavíkur í dag og dreifðu seðlum. Eins og Morgunblaðið greindi frá er annað hvort um að ræða raunverulega kjörseðla, eða seðla sem líktust þeim gríðarlega mikið. Katrín Theodórsdóttir telur þó útilokað að mönnum hafi tekist að stela seðlum úr kjördeildum. Meiri líkur séu á að seðlarnir séu falsaðir.

„Þá höfum við takmarkaðar áhyggjur af því," segir Katrín. Fölsuðu seðlarnir þurfi að vera verulega líkir hinum raunverulegu seðlum til að hægt sé að ruglast. „Það er þá pappírsþykktin, litaskalinn, prentunin," segir Katrín.

Engu að síður hafi hún látið lögregluna vita sem rannsaki nú málið.