Guðni: Ólafur er að uppskera þakklæti þjóðar sinnar

Guðni Ágústsson er mjög ánægður með fyrstu tölur úr forsetakosningunum. „Það er glæsilegt að fá helming þjóðar sinnar á bak við sig í kosningu. Ólafur er að vinna góðan sigur," segir Guðni sem var meðal þeirra sem skoruðu á Ólaf að bjóða sig fram aftur.

Þó Guðni vilji ekki eigna sér heiðurinn af því ef Ólafur fær að sitja áfram á Bessastöðum þá viðurkennir hann að undirskriftasöfnunin sem hann stóð fyrir hafi haft mikil áhrif á að Ólafur bauð sig aftur fram. „Það er engin spurning."

„Þó margt hafi verið fundið gegn framboði Ólafs hefur hann staðið sig vel á Bessastöðum og unnið þjóðinni í haginn. Hann er að uppskera þakklæti þjóðar sinnar fyrir það," segir Guðni.