Mörður sat einn hjá við afgreiðslu á þingskaparlögum

Mörður Árnason, þingmaður Samfylkingarinnar, sat einn hjá við atkvæðagreiðslu um frumvarp um breytingu á þingsköpum Alþingis í gær. Enginn greiddi atkvæði gegn breytingunum. Mörður segir helstu ástæðuna hafa verið þá að breytingin hafi fengið litla umræðu. Breytingarnar feli þó margt gott í sér. Hann segir að breytingarnar séu tvennskonar.

„Annars vegar eru almennar breytingar á þingsköpum sem sumar eru algerlega eðlilegar. Það er verið að taka svokallaðan septemberstubb," segir Mörður, en hingað til hefur þing komið saman í september í stutta stund áður en næsta þing er svo sett 1. október samkvæmt stjórnarskrá. Jafnframt sé þarna um að ræða smávægilegar breytingar, nánast prófarkalestur, á tillögum sem þegar höfðu verið samþykktar. „Það sem nefndin gafst upp við var hins vegar að hún tók ekki fyrir það sem í raun og veru var að í þingsköpum og atriði sem þarf að meta," segir Mörður. Málþófsreglur núna séu t.d. mun verri núna en þær voru. Einnig eru fleiri atriði sem Mörður hefði viljað ræða betur.

„Hinn parturinn er sá að þarna var verið að bæta kjörin, með ýmsum breytingum sem kallaðar voru leiðréttingar og kjarabætur fyrir þingmenn og varaþingmenn," segir Mörður. Hann hefur efasemdir um að þetta væri rétti tíminn til þess að þingið fari sjálft í kjarabætur. „Ég var óánægður með það að ekki skyldi tekið mark á tillögu sem ég og Valgerður Bjarnadóttir fluttum," segir Mörður. Tillaga þeirra tveggja snýr að því að þau vilja að kjaradómur ákveði öll kjör þingmanna. Fyrirkomulagið núna er hins vegar þannig að kjaradómur ákveður þingfarakaup en Alþingi ákveður svo það sem kemur ofan á það.

Þrátt fyrir að Mörður hafi ekki séð sér fært um að greiða atkvæði með frumvarpinu segist hann ekki leggjast mjög hart gegn þeim breytingum sem felast í því.