Á batavegi eftir vinnuslys

Karlmaðurinn sem slasaðist þegar hann vann við uppgræðslu við snjóflóðavarnargarðinn á Bolungarvík er á batavegi.

Áverkar mannsins, sem er á fertugsaldri, voru alvarlegir að sögn lögreglunnar á Vestfjörðum.

Er talið að traktor sem maðurinn var í hafi runnið fram af átta metra hárri brún við varnargarðinn. Tildrög slyssins eru enn óljós en líklegt þykir að vinnuvél mannsins hafi misst afl.

Maðurinn var fluttur til Reykjavíkur í þyrlu Landhelgisgæslunnar og komið undir læknishendur.

Samkvæmt vakthafandi lækni á gjörgæsludeild Landspítalans er maðurinn með meðvitund og heilsast ágætlega.