"Framtíð okkar er björt eins og sumarnóttin"

„Við erum ekki eyland. Við sem nú þjónum kirkjunni byggjum á því sem var og mótum það sem verður. Verkefni okkar er því sístætt. Sem kirkja höfum við þurft að horfast í augu við mörg lærdómsrík mál og búa þannig um hnúta að við horfum björtum augum til framtíðar. Það starf hefur eflt okkur og þeir ferlar sem mótaðir hafa verið eru öðrum fordæmi í samfélaginu."

Þetta sagði Agnes M. Sigurðardóttir, biskup, í ræðu sinni í Hallgrímskirkju í dag. Agnes tók formlega við embættinu í dag í viðurvist fjölda gesta. Þar á meðal voru þingmenn, ráðherrar og erlendir fulltrúar erlendra kirkja en alls voru ellefu erlendir biskupar viðstaddir athöfnina.

Agnes fór um víðan völl í ræðu sinni. Hún sagði að kirkjan hafi haft mótandi áhrif á samfélag okkar og að það fagnaðarerindi sem hún boðar sé bæði gefandi og gott.

Þá ræddi hún einnig um þá miklu fækkun sem orðið hefur í kirkjunni. Hún sagði að það væri verkefni kirkjunnar að fá þetta fólk til baka og að leiðin til þess sé í gegnum kærleika og ást. Hið góða erindi kirkjunnar sé hin rétta leið til að höfða til fólks.

„Nú þarf að setja það markmið að fjölga í kirkjunni og finna leiðir til þess," sagði Agnes. „Við þurfum að vera eins og hirðirinn sem leitar eða konan sem leitar. Þau leituðu þar til þau fundu og þannig eiga vinnubrögð okkar að vera."

„Framtíð okkar er björt eins og sumarnóttin og jafnvel þó að við villumst af leið um stund verður að okkur leitað þar til við finnumst. Hið sama á við í lífi okkar.