Öryggisgæsla við dómstóla lengi verið til skoðunar

Síðasta árið hafa öryggismál dómstóla verið í sérstakri skoðun hjá dómstólaráði. Þetta segir Símon Sigvaldason, formaður dómstólaráðs. Vinnunni er ekki lokið og því hefur enn ekki verið ákveðið að hrinda neinum tillögum í framkvæmd.

Mikið hefur verið rætt um öryggismál dómstóla uppá síðkastið, ekki síst eftir að maður veittist að lögreglumönnum þar sem þeir voru að leiða Börk Birgisson, dæmdan ofbeldismann, til þinghalds. Maðurinn fékk ekki að rétta Berki úlpu en við það missti hann stjórn á sér og réðist á lögreglumennina.

Í fréttum Ríkissjónvarpsins kallaði Björgvin G. Sigurðsson, formaður allherjarnefndar Alþingis, eftir því að öryggisgæsla dómstóla yrði efld.

Símon Sigvaldason sagði í viðtali í útvarpsþættinum Reykjavík Síðdegis í dag að öryggismál við dómstóla væru almennt í sífelldri endurskoðun. Frá lokum síðasta árs hefði þó farið fram sérstök athugun á öryggismálum. Símon sagði þá athugun ennþá standa yfir og því yrði einhver bið á að tillögum yrði hrint í framkvæmd.

Vopnaleitarhlið

Meðal þeirra leiða sem til greina koma til að auka öryggismál dómstóla er að taka upp vopnaleitarhlið í dómshúsum. Símon er ekki sérlega spenntur fyrir því og bendir á að lengra yrði ekki gengið í öryggisgæslu. „Það er mikill fjöldi fólks sem heimsækir dómshúsin á degi hverjum og yfirleitt hefur það bara gengið snurðulaust fyrir sig. Vopnaleitarhlið myndu valda miklu óhagræði fyrir það fólk allt," segir Símon.

Bakdyr

Ein lausn gæti verið að flytja fanga inn í salin eftir öðrum leiðum en inn um aðalinnganginn. Símon segir að það hafi að einhverju leyti verið gert, til að mynda er farið með fanga bakdyramegin inn í Héraðsdóm Reykjavíkur. Hins vegar séu almennt ekki aðstæður til að flytja fanga inn um sér innganga í dómshúsum landsins.