Aukning utankjörfundaratkvæða gæti táknað aukinn áhuga

Gunnari Helga Kristinssyni, prófessor í stjórnmálafræði, þykir merkilegt hvílík aukning hefur nú orðið á utankjörfundaratkvæðum frá síðustu kosningum. Ástæðuna má mögulega rekja til aukins áhuga á kosningunum. Sömuleiðis gæti verið að árstíminn spilaði inní, en eflaust verða margir á faraldsfæti þegar kosningarnar fara fram.

„Það er erfitt að giska á ástæðuna fyrir þessu. Það er vegna þess að hverjar forsetakosningar eru svo einstakar. Þær hafa verið svo fáar gegnum tíðina og þess vegna ekki margt sem við getum miðað við," segir Gunnar.

Hann telur að þeir sem flýta sér um of að kjósa gætu misst af merkilegum atriðum til að mynda sér skoðun nú á lokasprettinum í kosningabaráttunni. „En fólk sem verður ekki heima á kosningadag getur nú lítið verið að pæla í því," segir hann.

Frá þingkosningunum árið 2009 hefur utankjörfundaratkvæðum fjölgað um 40%. Nú þegar hafa yfir 10 þúsund manns kosið.