Bensínþjófur á sextugsaldri dæmdur

Karlmaður á sextugsaldri var dæmdur í 30 daga skilorðsbundið fangelsi í Héraðsdómi Reykjavíkur í morgun fyrir að hafa stolið bensíni þrisvar sinnum á síðustu þremur árum.

Í hvert skiptið fór maðurinn á bensínstöðvar í eigu N1 og fyllti mest á bílinn fyrir tólf þúsund krónur. Maðurinn játaði sakargiftir skýlaust en hann hefur ekki áður hlotið refsidóma. Hann gekkst hinsvegar undir sektargreiðslu vegna ölvunaraksturs árið 2006.

Refsingunni er frestað í tvö ár og fellur niður haldi maðurinn almennt skilorð.