Nasa ekki rifið - ASK vann miðbæjarsamkeppnina

Engar byggingar verða rifnar niður við uppbyggingu á Austurvelli og á Ingólfstorgi, samkvæmt tillögu um uppbyggingu í miðborginni sem fékk fyrstu verðlaun í arkitektasamkeppni sem efnt var til. Verðlaunaafhendingin fór fram nú síðdegis. Samkvæmt tillögunni stendur ekki til að rífa veitingastaðinn Nasa en húsinu og salnum verður gjörbreytt.

Samkvæmt tillögunni er uppbyggingu skipt í þrjá áfanga og hefur hver áfangi skýrt hlutverk. Í Vallarstræti verður fjölbreytt verslunar- og þjónustuhúsnæði. Markmiðið er að styrkja þjónustu í hjarta miðborgarinnar, auðga mannlíf og skapa áhugverða upplifun fyrir vegfarendur. Hrynjandi og form nýbygginga fellur almennt vel að nálægðri byggð, segir í niðurstöðum dómnefndar um tillöguna.

Samkomusalur við Thorvaldsensstræti 2 er endurbyggður sem skemmti- og ráðstefnusalur. Innangengt verður í veitingasal hótelsins. Landssímahúsið er allt skipulagt sem hótelbygging með viðbættri þakhæð og nýbyggingu við Kirkjustræti. Aðalinngangur í hótel er frá Kirkjustræti og innra skipulag hótels skapar tengsl við nærliggjandi almenningsrými, Víkurgarð og Austurvöll. Uppbygging á syðri hluta Ingólfstorgs, þar sem Hótel Ísland stóð, skapar nýja sýn og uppbyggingarmöguleika sem vert er að skoða. Tillagan gerir ráð fyrir að þar verði menningarhús.

Höfundar vinningstillögurnar eru arkitektarnir Þorsteinn Helgason og Gunnar Örn Sigurðsson. Ítarleg umfjöllun um tillögurnar verður í kvöldfréttum Stöðvar 2.