Neitar að hafa hrækt á dómara og kallað hana „tussu“

Börkur Birgisson neitaði sök í Héraðsdómi Reykjaness í dag þar sem ákæra gegn honum fyrir brot gegn valdstjórn var þingfest.

Börkur er ákærður fyrir að hafa hrækt á dómara Héraðsdóms Reykjaness, Söndru Baldvinsdóttur, og kallað hana „tussu“ í tvígang.

Atvikið átti sér stað í dómsal Héraðsdóms Reykjaness í apríl síðastliðnum þegar dómarinn úrskurðaði að Börkur skyldi afplána eftirstöðvar refsingar vegna fyrri afbrota.

Börkur mætti fyrir dómara Héraðsdóms Reykjaness í dag og neitaði þar sök. Áður hafði hann setið í einangrun en hann og félagi hans, Annþór Kristján Karlsson, eru grunaðir um að hafa orðið samfanga sínum að bana. Þeir eru að auki ákærðir fyrir skipulagða brotastarfsemi, kúgun og líkamsárás.