Fatasöfnun Rauða krossins hrundi eftir 2008

Fatagjafir til Rauða krossins drógust saman um tæp 45% eftir hrunið. Árið 2007 fékk Rauði krossinn 1.233 tonn af fötum gefins, en það var metár. Árið 2009 fengust aðeins 796 tonn.

Rauði krossinn hefur starfrækt formlega fatasöfnun frá árinu 2000. Verkefnið hefur vaxið hratt. Fyrsta árið söfnuðust 300 tonn sem jókst svo á hverju ári þar til toppinum var náð árið 2007. Þá fóru fatagjafirnar að dragast saman

„Það er eins og þjóðarsálin hafi fundið á sér að óveður var í aðsigi," segir Örn Ragnarsson, verkefnisstjóri Fatasöfnunarinnar, því árið 2008 söfnuðust einungis 1076 tonn af fötum. Hrunið varð svo algert árið 2009 þegar rúmlega helmingur safnaðist á við árið 2007.

Síðan þá hafa gjafir fólks aukist hratt og nú árið 2011 fengust 1116 tonn gefins. „Það stefnir allt í að við náum 2007 tölunum aftur eða jafnvel gott betur," segir Örn léttur í bragði.

Fatnaður sem Rauði krossinn aflar fer að einhverju leyti í fataverslanir Rauða krossins. Stór hluti er sendur til útlanda til sölu eða gjafa og stór hluti er gefinn þurfandi hér á landi.

Þær tölur sem hér er stuðst við taka aðeins mið af fatnaði sem er fluttur úr landi. Það magn sem sent er í búðir eða gefið þurfandi hér á landi er ekki með í tölunum, enda er það ekki vigtað í ferlinu. Því má gera ráð fyrir að heildarframlög hafi verið töluvert meiri öll árin.