Íhuga að örmerkja hnakka

„Menn standa náttúrulega ávallt ráðþrota fyrir því þegar farið er með skipulögðum hætti að eigum þeirra," segir Haraldur Þórarinsson, formaður Landssambands hestamanna.

Hann var gestur í útvarpsþættinum Reykjavík síðdegis á Bylgjunni í dag og ræddi þar við þáttastjórnendur um þá miklu aukningu sem hefur orðið í hnakkaþjófnaði á síðustu mánuðum.

Haraldur segir að úrræði hestamanna séu í raun takmörkuð. Ræningjarnir leiti einfaldlega í önnur hesthús þegar öryggismyndavélum og öryggiskerfum hefur verið komið fyrir.

Um mikla fjármuni er að ræða enda kostar nýr hnakkur á bilinu 150 til 450 þúsund.

„Við höfum rætt um að örmerkja hnakka líkt og við gerum við hestana," segir Haraldur. „Þannig er hægt að rekja slóð þeirra."

Hægt er að hlusta á viðtalið við Harald í heild sinni hér fyrir ofan.