Rafbíll tekinn á 124 km hraða

„Ég gleymdi mér í góða veðrinu," segir Gísli Gíslason, forstjóri Northern Light Energy. Hann var í gær fyrstur allra til að vera tekinn fyrir of hraðan akstur á rafbíl á Íslandi. Hann gerir ekki lítið úr alvarleika atviksins og hvetur aðra ökumenn til að fara varlega í umferðinni.

Gísli ekur á sportlegum Tesla Roadster-rafbíl og segir hann lögreglumennina hafa verið hissa á því að bíll knúinn áfram af íslenskri orku skyldi ná þessum hraða. Þeir mældu hann á 124 km hraða á Reykjanesbrautinni.

Tesla Roadster er tveggja manna sportbíll sem byggður er á Lotus Elise og braut blað þegar hann kom á markað fyrir nokkrum árum. Bíll Gísla er eini sinnar tegundar hér á landi.

Gísli hefur eins og kunnugt er unnið síðustu ár að rafbílavæðingu íslenska bílaflotans. Hann segist finna mikið fyrir auknum áhuga, pöntunum í rafbíla fjölgi stöðugt og innan fárra ára eigi mörg hundruð rafbílar eftir að keyra um götur landsins.