Steingrímur situr fund Brims hf. um kvótafrumvörp

Steingrímur J. Sigfússon, efnahags- og viðskiptaráðherra, mun sitja opin fund útgerðarfélagsins Brims hf. um áhrif frumvarpa um stjórn fiskveiða og veiðigjöld. Skipafloti Brims fór ekki til veiða í dag og mun flotinn vera við bryggju út vikuna í mótmælaskyni.

Á fundinum mun Guðmundur Kristjánsson, forstjóri Brims hf., fara yfir mat stjórnenda fyrirtækisins á áhrifum frumvarpanna á áframhaldandi rekstur félagsins. Þá er talið að Steingrímur muni fjalla um sýn stjórnvalda á almennum áhrifum frumvarpanna.

„Þetta verður létt og skemmtilegt," sagði Guðmundur í samtali við Vísi. „Markmiðið með fundinum er að sýna almenningi hvernig útgerðin og sjómenn tala saman og Steingrímur verður þátttakandi í þessum umræðum."

Guðmundur segir að umræða síðustu vikna um frumvörpin hafi verið flókin og að nú sé tími til kominn að ræða um hlutina á mannamáli.

Steingrímur og Björn Valur Gíslason, þingflokksformaður Vinstri Grænna, gagnrýndu á laugardag fyrirkomulag fundanna sem útgerðirnar ætla að halda um frumvörpin. Þá sagði Björn Valur að fyrirtækin ættu að bjóða stjórnmálamönnum og fjölmiðlafólki á fundina svo að almennileg umræða um málefnin gæti farið fram.

Guðmundur svaraði kalli þeirra og hefur nú boðið bæði stjórnmálamönnum og fjölmiðlafólki á fundinn en hann mun fara fram á þriðjudaginn í húsnæði Brims hf. á Miðbakka í Reykjavík. Fundurinn hefst klukkan 12:00.

Þá verður fundurinn einnig í beinni útsendingu á internetinu en hann má nálgast á heimasíðu Brims.