Borgarfulltrúi: Alls ekki við hæfi að þiggja boðsferðina

"Einar Örn hefur eitthvað misskilið það hvernig fara eigi með siðareglur ef hann heldur að hann geti túlkað þær með þessum hætti," segir Júlíus Vífill Ingvarsson, borgarfulltrúi Sjálfstæðisflokksins í Reykjavík.

Einar Örn Benediktsson, borgarfulltrúi Besta flokksins, þáði boðsferð með WOW air í jómfrúarferð félagsins til Parísar á fimmtudag í síðustu viku.

Einar Örn sagði við Vísi fyrr í kvöld að hann ætti sér annað líf fyrir utan borgarfulltrúastarfið og hann hefði farið á þeim forsendum að Skúli Mogensen, stjórnarformaður WOW air, sé gamall vinur hans. Þá sagðist hann einnig hafa borgað sjálfur fyrir sæti sitt en í henni voru fulltrúar fjölmiðla, ferðaskrifstofa og vinir stjórnenda WOW air.

Í siðareglum borgarfulltrúa í Reykjavík segir: „Kjörnir fulltrúar þiggja ekki gjafir, fríðindi eða önnur hlunnindi frá viðskiptamönnum eða þeim, er leita eftir þjónustu Reykjavíkurborgar nema að um sé að ræða óverulegar gjafir."

Júlíus Vífill segir í samtali við Vísi í kvöld að Einar Örn geti ekki skilið á milli persónunnar Einars Arnar og borgarfulltrúans Einars Arnar þegar kemur að því að þiggja boðsferðir frá einhverjum.

„Það er alls ekki við hæfi fyrir stjórnmálamenn að þiggja gjafir með þessum hætti. Ég held að enginn annar en Einar Örn myndi láta sér detta í hug að túlkar þessar reglur eins og hann er að gera. Að hann geti skilið sjálfan sig frá þeim störfum sem hann hefur verið valinn til í kosningum. Þetta er ekki eins og ráða sig í einhverja vinnu, þú ert að gefa kost á þér til starfa í almannaþágu," segir hann.

„Það verður að vera hafið yfir allan vafa hvernig þú stendur að þessum störfum þínum, að þau sé hægt að fara yfir og skoða á hverjum tíma og hvenær sem er. Það hafa allir rétt á að hafa skoðanir á okkar störfum. Ef menn vilja ekki að með þeim sé fylgst í því sem þeir eru að gera þá eiga menn bara að finna sér annað starf," segir Júlíus Vífill.

Spurður hvort að hann viti um dæmi þess að borgarfulltrúar hafi farið í ferðir sem þessar segir Júlíus:

„Mér er ekki kunnugt um að svo sé. Ég held að allir hljóti að sjá að það sé ekki við hæfi að þiggja slíkar ferðir. Það breytir engu í því sambandi þó að bjóðandinn sé gamall vinur, eins og Einar heldur fram," segir Júlíus Vífill.