Kolmunnastofninn er loksins að braggast

Loksins eru komnar fram vísbendingar um að kolmunnastofninn sé að braggast suður af landinu. Þetta er ein af niðurstöðunum úr árlegum rannsóknarleiðangri Árna Friðrikssonar til að kanna ástand kolmunnans og norsk-íslenska síldarstofnsins.

Í tilkynningu frá Hafrannsóknarstofnun segir að með landgrunnskantinum fyrir suðvestan og sunnan land og fannst töluvert magn af eins árs kolmunna. Við Íslands-Færeyjahrygginn var þennan árgang einnig að finna svo og á stórum svæðum út af landgrunni Noregs samkvæmt niðurstöðum Norðmanna.

Þessar niðurstöður eru sterkar vísbendingar um að loks sé að koma aftur sterkur árgangur af kolmunna, en allir árgangar frá og með 2005 hafa verið mjög litlir.

Útbreiðsla norsk-íslensku síldarinnar var svipuð og á sama tíma í fyrra. Stofninn er talinn minni nú en á síðasta ári. Þar sem sterkir árgangar hafa ekki komið í stofninn síðan árið 2004, hefur hann verið á niðurleið frá 2009. Þessi þróun á stærð stofnsins mun halda áfram þar til sterkir árgangar koma inn í stofninn og þeir ná veiðanlegum aldri. Ennþá eru engar vísbendingar um að sterkir árgangar séu á leiðinni.