Einar K.: Fiskveiðistjórnunarkerfið ekki mannréttindabrot

Einar K. Guðfinnsson, fyrrverandi sjávarútvegsráðherra, fagnar þeirri niðurstöðu mannréttindanefndar Sameinuðu Þjóðanna að fiskveiðistjórnunarkerfi Íslendinga sé ásættanlegt. Áður hafði nefndin ályktað að kerfið bryti gegn mannréttindum en nú hefur málinu verið lokað.

„Ég veit ekki nákvæmlega hvað varð til þess að málið er látið niður falla. Á sínum tíma tókum við álitið mjög alvarlega," segir Einar sem var sjávarútvegsráðherra þegar nefndin taldi fiskveiðikerfið brot á mannréttindum. Stjórnvöld svöruðu álitinu ítarlega með rökstuddum hætti.

Ein helsta röksemdin var sú að álit nefndarinnar tæki ekki mið af þeirri þróun sem orðið hefði á fiskveiðistjórnunarkerfinu frá árinu 1984. Því væri álitið ekki reist á réttum forsendum.

„Ég tel að með áliti sínu núna sé nefndin að fallast á þessar röksemdir okkar," segir Einar og þykir niðurstaða nefndarinnar núna mikil tímamót, „enda loks komið á hreint að löggjöfin felur ekki í sér brot á mannréttindum," bætir hann við.

Sjálfur segir Einar að viðbrögð íslenskra stjórnvalda við fyrra áliti nefndarinnar hafi verið óvenju markviss og ítarleg.