Líklega strandveiðarnar sem gera kerfið ásættanlegt

Össur Skarphéðinsson telur að reglur um strandveiðar hafi leitt til þess að Mannréttindanefnd Sameinuðu þjóðanna segir nú fiskveiðistjórnunarkerfi Íslendinga ásættanlegt og hefur lokað málinu.

Á árinu 2007 komst nefndin að þeirri niðurstöðu að fiskveiðistjórnunarkerfið bryti gegn ákvæðum mannréttindasáttmála. Íslensk stjórnvöld gerðu grein fyrir máli sínu og nú telur nefndin þau hafa brugðist við með fullnægjandi hætti.

„Við áttum ekkert von á þessu," segir Össur um niðurstöðu nefndarinnar sem barst fyrir tveimur dögum. Hann segir niðurstöðuna frekar óljósa og ekki komi beinlínis fram hvað hafi orðið til þess að nefndin skipti um skoðun. Helst grunar hann að reglurnar um strandveiðarnar hafi haft áhrif á nefndina.

Össur hefur þegar reynt að afla frekari upplýsinga um málið.