Neyddi félaga sinn til að dansa "moonwalk“

Maður í Idaho í Bandaríkjunum hefur verið ákærður fyrir líkamsárás eftir að hann neyddi annan mann til að framkvæma dansspor sem Michael Jackson gerði frægt á sínum tíma.

Það voru fjölmiðlar í Bonner sýslu í Idaho sem greindu frá þessu í dag. Hinn þrítugi John Ernest Cross var handtekinn á þriðjudaginn og hefur nú verið ákærður.

Samkvæmt lögreglunni í Bonner átti atvikið sér stað á heimili Cross. Lögreglan var kölluð á staðinn eftir að Cross miðaði sjálfvirkum riffli að manni og skipaði honum að dansa „moonwalk" en það er dansspor sem popparinn Michael Jackson gerði frægt á níunda áratugnum.

Cross viðurkennir að hafa neytt félaga sinn til að dansa fyrir sig en heldur því fram að vopnið hafi í raun verið loftbyssa.