Afturelding bikarmeistari í blaki í fyrsta sinn

Afturelding varð bikarmeistari kvenna í blaki eftir öruggan 3-0 sigur á Þrótti í úrslitaleik Asicsbikarsins í Laugardalshöllinni í dag. Þetta er fyrsti titilinn sem Afturelding vinnur í blakinu.

Afturelding vann hrinurnar 25-18, 25-17 og 25-19 en í þeim öllum var jafnt fram í lokin þegar Mosfellskonur gerðu alltaf út um hrinurnar með góðum endaspretti.

Reynsla Aftureldingarliðsins skilaði sér þarna á móti ungu og efnilegu liði Þróttar en nokkrir leikmenn Aftureldingar urðu bikarmeistarar með Þrótti Nes í fyrra.