Rúnar Már á leiðinni til Aserbaídsjan

Eyjólfur Sverrisson, landsliðsþjálfari U21 karla, hefur gert breytingu á hópnum sínum fyrir leik á móti Aserbaídsjan í undankeppni EM en leikurinn fer fram í Aserbaídsjan 29. febrúar næstkomandi.

Eiður Aron Sigurbjörnsson, leikmaður Örebro í Svíþjóð, er meiddur og hefur Eyjólfur því kallað á Rúnar Már S. Sigurjónsson úr Val. Rúnar Már lék sinn fyrsta og eina 21 árs landsleik í 0-3 tapi á móti Englendingum á Laugardalsvellinum síðasta haust.

Eyjólfur valdi á sínum tíma 19 leikmenn í hópinn sinn. Íslendingar eru með 3 stig eftir fjóra leiki í riðlinum en Aserar hafa hlotið 1 stig, einnig eftir fjóra leiki.