"Þjónkun við þá aðila sem helst óttast FME"

Gunnar Þ. Andersen segir að sér sé ekki kunnugt um að nokkur annars starfsmaður eða embættismaður hins opinbera á Íslandi „hafi mátt sæta öðrum eins sí endurteknum og útvíkkuðum rannsóknum á hæfi sínu og störfum að öðru leyti, án alls sýnilegs eða raunverulegs tilefnis."

Þetta kemur fram í bréfi sem Gunnar skrifaði Ástráði Haraldssyni hæstaréttarlögmanni hinn 9. febrúar síðastliðinn en um var að ræða andmæli Gunnars við drögum að álitsgerð sem Ástráður var að vinna ásamt Ásbirni Björnssyni, endurskoðanda.

Þjónkun við hrunverja

Gunnar segir í bréfinu, sem fréttastofan hefur undir höndum, að hinar látlausu og tilefnislausu rannsóknir, endurteknar rannsóknir upphaflegra rannsóknaraðila , nýjar gagnasafnanir sem engu skila, rannsóknir nýrra aðila og útvíkkaðar rannsóknir séu í raun „þjónkun við þá aðila sem helst óttast FME og skilvirka starfsemi stofnunarinnar undir minni stjórn."

Þessi orð Gunnas eru athyglisverð fyrir þær sakir að það eru einmitt helst aðilar tengdir hluthöfum föllnu bankanna sem hafa látið hæst í sér heyra um afsögn hans. Ólafur Arnarson, hagfræðingur og álitsgjafi, hefur ritað á vefsíðu sína á Pressunni á annan tug pistla þar sem hann dregur ýmist hæfi Gunnars í efa eða krefst afsagnar hans.

Komið hefur fram að Ólafur var á launum hjá Gunnari Steini Pálssyni almannatengli sem hefur unnið fyrir hluthafa og stjórnendur Kaupþings banka. Þá er Ólafur tengdur Hreiðar Má Sigurðssyni, fyrrverandi forstjóra Kaupþings, fjölskylduböndum. Ólafur hefur ekki svarað spurningum um málið til þessa, en fullyrðir að hann hafi aldrei þegið greiðslu fyrir skrif sín. „Megnið af mínu starfi er ráðgjöf sem ég vinn í trúnaðarsambandi við mína verkkaupa og því hef ég tekið þann pól í hæðina að ég upplýsi ekki um fyrir hvern ég vinn," segir Ólafur í samtali við fréttastofu.

Ólafur er skráður stofnandi tveggja einkahlutafélaga í fyrirtækjaskrá, B-Holding ehf og Kelvin ehf. sem stofnuð voru 2006 og 2007 og bæði eru þau skráð heima hjá honum en hvorugt þeirra hefur nokkurn tímann skilað ársreikningi.

Hefur þú þegið greiðslur fyrir störf þín fyrir Exista og tengda einstaklinga og félög eða Fons og tengda einstaklinga og tengd félög?

„Ég hvorki játa né neita, því mín ráðgjafarstörf eru trúnaðarmál milli mín og þeirra sem kaupa af mér ráðgjöf. Þeir sem kaupa af mér ráðgjöf mega mér að sársaukalausu upplýsa um það," segir Ólafur en hann fullyrðir að sín störf fyrir „hina og þessa" hafi ekki áhrif á skrif sín á Pressunni. „Mér finnst algjörlega fráleitt að stilla máli Gunnars þannig upp eins og hann gerir sjálfur, og Þorvaldur Gylfason gerir raunar líka, að það sé sjálfstætt áhugamál þeirra sem tengjast með einhverjum hætti hruninu að koma Gunnari frá. Ég hef þvert á móti skrifað greinar um að Gunnar þvælist fyrir sérstökum saksóknara með því að senda órannsökuð mál til hans."

Í þessari samantekt má líka nefna Sigurð G. Guðjónsson, verjanda Sigurjóns Þ. Árnasonar, sem hefur oft og ítrekað kallað opinberlega eftir afsögn Gunnars. Sama dag og Sigurjón var hnepptur í gæsluvarðhald, 14. janúar 2011, vakti Sigurður athygli á tengslum Gunnars við aflandsfélögin LB Holding og NBI Holdings, en um þau er fjallað í skýrslu RNA. Í nóvember sl. skrifaði hann grein með fyrirsögninni „Það á að reka Gunnar Andersen úr starfi forstjóra FME."

Andstætt starfsmanna- og stjórnsýslulögum

Í áðurnefndu bréfi Gunnars til Ástráðs segir Gunnar jafnframt að sí endurtekin athugun stjórnar FME á hæfi hans án nægjanlegs tilefnis sé auk þess andstæð meginreglum bæði stjórnsýslu- og starfsmannalaga og spurning hversu lengi er við það búandi. „Almenna reglan er auðvitað sú að stjórnvald getur ekki kallað til nýja álitsgjafa og tekið upp fyrri ákvarðanir af því tilefni einu, ef ekkert nýtt liggur fyrir í málinu," segir Gunnar.

Áður en Ástráður og Ásbjörn unnu endurskoðað mat á hæfi Gunnars hafði Andri Árnason, hæstaréttarlögmaður, tvívegis komist að þeirri niðurstöðu að Gunnar væri hæfur. Reyndar sjá þeir Ástráður og Ásbjörn ekki ástæðu til að draga í efa niðurstöður Andra um hæfi Gunnars, en segja að engur að síður hafi komið fram upplýsingar um atvik sem séu til þess fallnar að kasta rýrð á hæfi Gunnars til að gegna starfi forstjóra FME. Þá segja þeir að engar vísbendingar séu um lögbrot og að niðurstaða þeirra sé „huglæg" en byggð á gögnum málsins.

Formlega hefur ekki verið gengið frá starfslokum Gunnars. Hann hefur fengið frest þangað til á morgun að skila endanlegum andmælum til stjórnar FME þar sem hann tekur afstöðu til þeirrar ákvörðunar stjórnarinnar að biðja hann um að láta af störfum. Eins og komið hefur fram telur hann ákvarðanir stjórnar FME ekki byggjast á lögmætum grunni, þar sem ekki séu fyrir hendi almenn skilyrði fyrir endurupptöku, þ.e endurskoðuðu hæfi hans, þar sem engin ný gögn eða upplýsingar réttlæti endurskoðað mat á hæfi. Eins og fréttastofa hefur greint frá sakaði lögmaður Gunnars stjórn FME um einelti í garð umbjóðanda síns í bréfi sem hann ritaði Aðalsteini Leifssyni, stjórnarformanni FME á föstudag.

Það sem er athyglsvert í þessu er að Seðlabanki Íslands á tvo fulltrúa í stjórn FME, en annar þeirra er Arnór Sighvatsson, aðstoðarseðlabankastjóri. Hin meinta aðför gegn forstjóranum hefur því væntanlega verið með vitund og vilja fulltrúa Seðlabankans, hafi hún á annað borð átt sér stað.

Aðalsteinn Leifsson hefur kosið að svara ekki þessari ásökun um einelti. Sjá hér ítarlega fréttaskýringu um mál Gunnars. thorbjorn@stod2.is