Telja að rýrð sé kastað á hæfi Gunnars - greinargerðin birt

Ástráður Haraldsson og Ásbjörn Björnsson telja að fram hafi komið upplýsingar um atvik í starfi Gunnars Andersen, forstjóra Fjármálaeftirlitsins, fyrir aflandsfélög Landsbankans sem séu til þess fallin að kasta rýrð á hæfi hans til að gegna starfi forstjóra Fjármálaeftirlitsins. Þetta kemur fram í áliti sem þeir unnu fyrir stjórn FME og sent hefur verið fjölmiðlum.

„Við teljum þessi atvik ekki leiða til vanhæfis hans til þess að gegna skyldum forstjóra, en upplýsingar um atvikin eru til almennrar umfjöllunar og geta truflað starfsemi FME og tafið fyrir uppbyggingu trausts almennings á starfsemi stofnunarinnar," segir í áliti þeirra.

Þá segja Ástráður og Ásbjörn að hafa beri í huga að siðferðislegt mat sem lagt sé á núna, í ljósi alls þess sem á undan er gengið á undanförnum árum, sé ef til vill ekki alfarið sanngjarnt að heimfæra ótilgreint á þær aðstæður sem til staðar voru árið 2001, þegar Gunnar starfaði fyrir Landsbankann. „Segja má að ýmislegt af því sem við nú sjáum að voru óheilbrigðir viðskiptahættir hafi ekki verið eins augljóst fyrir tíu eða fimmtán árum. Ýmsum veitist létt að vera vitrir eftirá," segir í álitinu.

Eins og kom fram á Vísi fyrr í dag telja þeir Ástráður og Ásbjörn að upplýsingar um heildarstarfsemi bankans hefðu ekki verið eins ítarlegar og gera mátti kröfu um, en það kom í hlut Gunnars að svara Fjármálaeftirlitinu fyrir hönd Landsbankans árið 2001. „Við teljum að þrátt fyrir meinta óvissu um lagaleg tengsl Landsbanka Íslands hf. og sjálfs-eignarsjóðsins á Guernsey og félaga í hans eigu á þessum tíma, sé ótvírætt að í bréfi FME frá 29. maí 2001 var verið er að grennslast fyrir um erlenda starfsemi bankans í víðasta skilningi og að í ljósi þekkingar sinnar og stöðu innan Landsbankans hefði Gunnar Þ. Andersen mátt vita að svar bankans var ófullnægjandi og beinlínis villandi," segir í áliti þeirra Ástráðs og Ásbjörns.