Eldri bílafloti – minna öryggi

Bílafloti landsins heldur áfram að eldast. Þetta sýna bæði tölur yfir nýskráða bíla og tölur yfir bíla sem skilað hefur verið til úrvinnslu. Á árunum fyrir hrun var í kringum átta þúsund bílum fargað á ári miðað við tæplega þrjú þúsund í fyrra samkvæmt tölum frá Úrvinnslusjóði.

Svipaða sögu má segja um nýskráða bíla, þeim snarfækkaði eftir hrun.

Afleiðingin er að meðalaldur bíla á Íslandi hefur hækkað úr 9,8 árum fyrir hrun upp í tæplega tólf ár.

„Þetta er í engum takti við það sem það ætti að vera, miðað við eðlilega endurnýjun bílaflotans. Nú er reynt að keyra þetta eins lengi og mögulegt er. Óhóflega lengi miðað við öryggi bíla og eyðslu,“ segir Özur Lárusson, framkvæmdastjóri Bílgreinasambandsins.

Rúnar Gestsson, framkvæmdastjóri Vöku, finnur fyrir sömu þróun mála en hann segir þá bíla sem koma inn til hans í verulega slæmu ástandi.

„Þetta eru bílar sem eru löngu komnir á aldur og ættu margir að vera komnir af götunni fyrir löngu. Menn keyra bara bílana þangað til það er ekki möguleiki að halda þeim gangandi lengur.“

Özur Lárusson segir að þrátt fyrir að nýskráningum hafi fjölgað lítillega í ár frá því í fyrra, sé ástandið langt í frá viðunandi.

„Eðlileg endurnýjunarþörf bílaflotans er í kringum tólf til fjórtán þúsund nýskráðir fólksbílar á ári. Við reiknum með að þetta geti orðið 6.500 bílar í ár.“

Einar Magnús Magnússon, upplýsingafulltrúi Umferðarstofu, segir að langt sé síðan stofnunin lýsti yfir áhyggjum af þróuninni.

„Bílarnir eru alltaf að verða betri með tilliti til öryggis. Þess vegna er það mjög miður ef við höldum ekki í þá þróun með endurnýjun bílaflotans. Því eldri sem bílarnir eru þeim mun meiri líkur eru á að ekki sé allt í fullkomnu lagi. Þannig að við höfum af þessu áhyggjur, það er ekkert launungarmál.“ - ktg