"Frekar epískt að selja Emmu Watson bíómiða“

„Það var frekar epískt að selja Emmu Watson bíómiða," segir Hildur Ólafsdóttir afgreiðslustúlka í Háskólabíó sem afgreiddi stórstjörnuna þegar hún kom að horfa á kvikmyndina To Rome with Love klukkan hálf sex í dag.

„Mér brá dálítið mikið," segir Hildur sem seldi Emmu þrjá bíó miða. Emma var í fylgd tveggja kvenna en önnur þeirra var roskin og því vaknaði grunur hjá starfsfólki kvikmyndahússins að um móður leikkonunnar væri að ræða.

Leikkonan kunni sig að sögn Hildar og hagaði sér með prýði. „Hún var bara rosalega indæl," segir hún.

Hildur segir að fáir hafi verið í bíó þegar Emmu bar að garði og fæstir hafi tekið eftir nærveru hennar. „Hins vegar voru þrjár litlar stelpur sem ráku augun í hana og voru í miklu sjokki," enda um göldrótta hetju úr vinsælustu bókaseríu heims að ræða.