Boðar aukna þátttöku í opinberri umræðu

Ólafur Ragnar Grímsson sagði í viðtali við Sigurjón M. Egilsson í Sprengisandi í morgun að það væri margan lærdóm hægt að draga af nýloknum forsetakosningum, en Ólafur Ragnar var endurkjörin með um 53 prósent atkvæða. Meðal annars sagði hann að almenningur kallaði eftir vitrænni samræðu og að tími auglýsinga og slagorða væri liðinn.

Athygli vekur að Ólafur Ragnar veitti Sprengisandi fyrsta viðtalið eftir að hafa verið endurkjörin en hann hóf einmitt baráttu sína í sama útvarpsþætti um miðjan maí. Ástæðuna sagði hann vera meðal annars vegna þess að útvarpið væri öflugur miðill þar sem hægt væri að kryfja mál til mergjar en ekki vera á handahlaupum, eins og hann orðaði það með hraða annarra fjölmiðla.

„Kjarni málsins er sá, að sú lýðræðisbylting sem varð með þjóðaratkvæðagreiðslunni um Icesave, burtséð frá efni kosninganna, hefur styrkt á ótrúlegan hátt lýðræðislega kröfu fólks í landinu um að vilji þeirra ráði för," sagði Ólafur Ragnar.

Hann sagði vantraust á Alþingi einnig alvarlegt vandamál en það hefur hann áður minnst á í kosningabaráttunni. Hann sagði nauðsynlegt að endurreisa trú fólks á stofnuninni, enda einn af hornsteinum lýðræðisins.

Hann benti ennfremur á að vantraust á Alþingi yki á þá kröfu almennings gagnvart forsetanum, að hann beitti sér með ríkari mæli í stjórnmálum en áður hefur þekkts. Hann sagði þó ekki eðlilegt að fara út fyrir stjórnskipun embættisins, líkt og sumir frambjóðendur hafi talað fyrir.

Ólafur Ragnar sagði ennfremur, og það má vera að þar sé að finna einhverja stefnubreytingu sem áður var, um að forsetinn ætti að taka þátt í umræðum um hin stærstu mál, en með hófsömum og skynsömum hætti, með það að leiðarljósi að hjálpa þjóðinni að finna farsæla niðurstöðu.

Nánar er rætt við Ólaf Ragnar á Stöð 2 í fréttunum í hádeginu.