Tímabilið hefst fyrr en áður

Ferðamannastraumurinn í ár um Snæfellsnes byrjar óvenju snemma. Þetta segir Ingi Hans Jónsson sem rekur kaffihúsið og minjasafnið Kaffi Emil á Grundarfirði.

„Ég held að það sé bæði veðráttan og aukið framboð á gistingu í Grundarfirði sem orsaki þyngri ferðamannastraum hingað,“ segir Ingi Hans. „Trúlega hefur bensín og ferðakostnaður áhrif á að þunginn sé að aukast hér á Vesturlandi og Suðurlandi.“

Með þessum aukna bensínkostnaði staldri fólk lengur við og dvelji jafnvel á tjaldstæðum nokkrar nætur í röð og nýti dagana til að ferðast um svæðið. Áður brunuðu ferðamenn bara í gegn.

Mestur er ferðamannastraumurinn frá því um miðjan júní og þar til um miðjan ágúst ár hvert. Í ár byrjaði straumurinn að verulegu leyti í lok maí. Hann telur aukið flugframboð til og frá landinu orsaka þennan þunga straum enda auglýsi flugfélögin landið mikið.

Ingi Hans segir að einnig hafi verið óvenju mikið um ferðamenn á svæðinu í vetur. Þá séu hvalirnir helsta aðdráttaraflið. „Það er líka gríðarleg aukning í vetrarferðamennsku. Það eru hvalirnir og lífríkið hérna sem trekkja helst að.“

- bþh