Jóhanna vill að ráðherrar víki af þingi

Jóhanna Sigurðardóttir forsætisráðherra vill skoða þá hugmynd að ráðherra víki af Alþingi þegar þeir hafa verið skipaðir. Hún telur að slík breyting mundi styrkja þingræðið. Forsætisráðherra kom inn á málið í hátíðarræðu sinni 17. júní.

„Margir eru þeirrar skoðunar að ráðherrar eigi ekki að gegna þingmennsku þegar þeir hafa verið skipaðir í embætti. Þessi fækkun og stækkun ráðuneyta gefur svo sannarlega tækifæri til þess að raungera þá hugmynd. Sú róttæka breyting myndi að mínu mati styrkja þingræðið og hvet ég til þess að þetta mál verði skoðað af fullri alvöru."

Bjarni Benediktsson, formaður Sjálfstæðisflokksins, segir galla á þessari hugmynd að stjórnarflokkar hverju sinni fái þá þingmenn í stað þeirra ráðherra sem víkja sæti um leið og ráðherrar hafi áfram málfrelsisrétt á Alþingi. Þannig halli verulega á stjórnarandstöðuna hverju sinni.

„Það má velta því fyrir sér hvort hreinlega eigi ekki að fækka þingmönnum," segir Bjarni og vísar til þess að nýir þingmenn kæmu þá ekki inn fyrir þá ráðherra sem vikju. „Ég tel í það minnsta ekki tilefni til að gera breytingar sem myndu í raun fjölga kjörnum fulltrúum."

Valgerður Bjarnadóttir, þingmaður Samfylkingarinnar, lagði fram frumvarp um málið á síðasta þingi, en það féll niður.- kóp