Segist hafa ekið á sjötíu kílómetra hraða - sérfræðingur ósammála

Átján ára piltur sem hefur verið ákærður fyrir manndráp af gáleysi segist hafa verið á sjötíu kílómetra hraða þegar hann missti stjórn á bíl sínum, með þeim afleiðingum að Eyþór Darri Róbertsson lést. Sérfræðivitni segir ómögulegt að ökumaðurinn hafi verið á undir hundrað kílómetra hraða.

Aðalmeðferð í málinu hófst í morgun í Héraðsdómi Reykjavíkur. Atvikið átti sér stað í ágúst á síðasta ári. Ökumaðurinn er ákærður fyrir að hafa ekið, próflaus, langt yfir leyfilegum hámarkshraða. Í ákæru segir að ætlaður hraði sé 119 kílómetrar á klukkustund, mögulegur lágmarkshraði sé 102 en mögulegur hámarkshraði 136 kílómetrar á klukkustund. Leyfilegur hámarkshraði þarna var 50.

Pilturinn mótmælir þessu ákæruatriði og sagði fyrir dómi í morgun að hann hefði verið á sjötíu kílómetra hraða. Þeir hafi verið þrír í bílnum og á götuljósum við Hörpuna hafi þeir staðnæmst á rauðu ljósi við hliðina á samskonar bíl, og séð að þar voru þrjár stelpur.

Auk ökumannsins kom farþegi bílsins fyrir dóminn í morgun, sem og allar stelpurnar. Fram kom að strákarnir höfðu verið að fíflast í þeim á ljósunum, hækkað í græjunum og veifað til þeirra. Þær veifuðu á móti og brostu. Öll neituðu þau að hafa verið í spyrnukeppni en ökumenn beggja bíla gáfu engu að síður í þegar græna ljósið kom. Þá fannst þeim ómögulegt að áætla hraða bílsins sem Eyþór Darri var í. Ein stúlkan taldi ökumanninn þó hafa ekið glannalega, mun hraðar en aðrir bílar á Geirsgötunni og sveigt á milli þeirra.

Ökumaðurinn missti síðan stjórn á bílnum á mótum Geirsgötu og Tryggvagötu, lenti á steini sem vó um hálft tonn og kastaðist steinninn við höggið, bíllinn kastaðist þaðan á húsið og lentu framljós bílsins á húsinu í tæplega tveggja metra hæð.

Meðal sérfræðivitna sem komu fyrir dóminn var prófessor í vélaverkfræði sem rannsakaði bílinn og vettvang slyssins. Hann sagði útilokað að hraðinn hefði verið undir 102 kílómetrum á klukkustund, og mun meiri líkur á að hann hafi verið á yfir 119 kílómetra hraða.

Aðalmeðferð málsins stendur enn yfir.