Fór of hratt til að sjást á myndavél

Átján ára piltur sem ákærður er fyrir manndráp af gáleysi, neitaði ofsaakstri fyrir dómi í morgun. Sérfræðivitni bar að bíllinn hefði farið oft hratt til að mynd af honum næðist á eftirlitsmyndavél.

Aðalmeðferð í málinu fór fram í dag, en það var í ágúst á síðasta ári sem Eyþór Darri Róbertsson lést, sautján ára gamall, eftir að bíll sem hann var farþegi í hafnaði á húsvegg. Eyþór höfuðkúpubrotnaði og var slökkt á öndunarvélum tveimur dögum eftir slysið.

Ökumaður bílsins var einn besti vinur Eyþórs. Hann mætti fyrir dóm í fylgd bróður síns og föður. Aðstandendur Eyþórs Darra voru einnig mættir.

Sérfræðivitni sem rannsakaði málið kom fyrir dóminn í dag sagðist meðal annars hafa farið yfir myndir úr eftirlitsmyndavél á svæðinu til að reyna að ákvarða hvaðann sem bíllinn var á. Eftirlitsmyndavélin er með 15 metra sjónsvið og tók 2 myndir á sekúntu. Engin mynd náðist af bílnum þegar hann fór framhjá sjónsviði vélarinnar. Samkvæmt því var hann á yfir hundrað kílómetra hraða á klukkustund, samkvæmt vitninu.

Ítarlega hefur verið fjallað um aðalmeðferðina á Bylgunni og á Vísi í dag. Fram hefur komið að ökumaðurinn sagði fyrir dómi í morgun að hann hafi verið á sjötíu kílómetra hraða áður en slysið varð. Í ákæru segir að ætlaður hraði sé 119 kílómetrar á klukkustund, mögulegur lágmarkshraði sé 102 en mögulegur hámarkshraði 136 kílómetrar á klukkustund. Leyfilegur hámarkshraði var 50.

Pilturinn sem ók sagði að þeir hafi verið þrír í bílnum og á götuljósum við Hörpuna hafi þeir staðnæmst á rauðu ljósi við hliðina á samskonar bíl, og séð að þar voru þrjár stelpur.

Auk ökumannsins kom farþegi bílsins fyrir dóminn í morgun, sem og allar stelpurnar. Fram kom að strákarnir höfðu verið að fíflast í þeim á ljósunum, þeir hækkað í græjunum og veifað til þeirra. Þær veifuðu á móti og brostu. Öll neituðu þau að hafa verið í spyrnukeppni en ökumenn beggja bíla gáfu engu að síður í þegar græna ljósið kom. Þá fannst þeim ómögulegt að áætla hraða bílsins sem Eyþór Darri var í. Ein stúlkan taldi ökumanninn þó hafa ekið glannalega, mun hraðar en aðrir bílar á Geirsgötunni og sveigt á milli þeirra.

Ökumaðurinn missti síðan stjórn á bílnum á mótum Geirsgötu og Tryggvagötu, lenti á steini sem vó um hálft tonn og kastaðist steinninn við höggið, bíllinn beinlínis flaug þaðan á húsið og lentu framljós bílsins á húsinu í tæplega tveggja metra hæð.

Meðal sérfræðivitna sem komu fyrir dóminn var prófessor í vélaverkfræði kom að rannsókninni og sagði útilokað að bíllinn hefði verið á undir 100 kílómetra hraða.

Lögreglumaður sem er einn af lykilvitnum í málinu komst ekki fyrir dóminn í dag. Því þurfti að fresta lokum aðalmeðferðar fram á föstudag.