Fjárlög kynnt á Alþingi í dag

Fjárlagafrumvarp ársins 2013 verður lagt fram og kynnt á fyrsta degi haustþings í dag.

Þing verður sett klukkan 13.30 í dag með hefðbundnu sniði. Byrjað verður á guðsþjónustu í Dómkirkjunni og síðan munu þingmenn, ásamt forseta Íslands og biskupi, ganga yfir í Alþingishúsið. Þar mun forsetinn setja þingið skömmu eftir klukkan tvö.

Ekki verður brugðið út af vananum við þingsetninguna þrátt fyrir kröftug mótmæli í fyrra, þar sem eggjum var látið rigna yfir þingmenn sem þeir gengu úr kirkjunni. Öryggismál verða venju samkvæmt í höndum lögreglunnar.

Þingfundur hefst síðan klukkan fjögur síðdegis og verður fjárlagafrumvarpið að vanda það fyrsta sem lagt verður fyrir þingið. Frumvarpið verður það fyrsta sem lagt er fyrir þingið í fjármálaráðherratíð Oddnýjar G. Harðardóttur, og það síðasta á þessu kjörtímabili. - sh