Leikbann Ibrahimovic stytt

Zlatan Ibrahimovic, leikmaður AC Milan, þarf bara að taka út tveggja leikja bann fyrir rauða spjaldið sem hann fékk í leik gegn Bari fyrir tveimur vikum síðan.

Ibrahimovic sló Marco Rossi, leikmann Bari, í leiknum og fékk fyrir það þriggja leikja bann. AC Milan áfrýjaði dómnum og var honum breytt í dag.

Hann mun engu að síður missa af grannaslagnum gegn Inter Milan um næstu helgi en það er einnig toppslagur í ítölsku úrvalsdeildinni.

Milan er í efsta sæti deildarinnar með 62 stig, tveimur meira en Inter. Napoli er svo í þriðja sæti með 59 stig. Átta umferðir eru eftir af tímabilinu.