Ófremdarástand í málefnum barna sem búa við heimilisofbeldi

Talið er að um tvö þúsund börn verði vitni að heimilisofbeldi árlega. Engin úrræði eru í boði fyrir þessi börn. Til að mynda urðu börn sem urðu fyrir hrottalegu ofbeldi af hendi föður síns í svokölluðu hnífakastaramáli að bíða í hálft ár eftir sérfræðiaðstoð. Þetta er meðal þess sem kemur fram í rannsókn á félagslega kerfinu í Reykjavík.

Mál barna sem búa við heimilisofbeldi eru algjörum ólestri og nær engin úrræði eru fyrir þessi börn innan félagslega kerfisins.Þetta sýnir ný rannsókn en niðurstöður hennar eru algjör áfellisdómur yfir félagslega kerfinu í Reykjavík.

Farið var yfir málið í morgun á málþingi samtakana Barnaheilla, sem stóðu að rannsókninni. Yfirskrift málþingsins var „Átta ára á drengur óskar eftir íbúð."

Petrína Ásgeirsdóttir, framkvæmdastjóri Barnaheilla, og fagfólk sem rætt var við í rannsókninni, segja að skilningsleysi á málefnum þessara barna verði jafnvel til þess að þau eru greind með kvilla sem þau þjást ekki af.

Lyf ekki alltaf við hæfi

„Þegar verið er að greina börn sem eiga við vandkvæði að stríða virðist vera mikill misbrestur á því hvort verið sé að spyrja þau um það hvort ofbeldi eigi sér stað á milli foreldra, eða gagnvart móður. Þar af leiðandi er verið að greina börn sem eru óþekk og erfið, eða þau sem eiga erfitt með að einbeita sér, með ofvirkni- og athyglisbrest, sem þau eru kannski alls ekki með. Við bendum því á það í skýrslunni að það sé mikilvægt að huga að fjölskylduaðstæðum þannig börn fái réttan og viðeigandi stuðning og að ekki sé verið að meðhöndla börn með lyfjum sem ætluð eru börnum með ofvirkni- og athyglisbrest en geta verið skaðleg þeim sem ekki eru með það," segir Petrína.

Þróa með sér áfallastreituröskun



Í skýrslunni segir að heili barna er sérstaklega viðkvæmur gagnvart streitu þar sem hann sé að þroskast.

Núorðið sé það viðurkennt að barn, sem verður vitni að ofbeldi gegn móður eða milli foreldra, getur þróað með sér áfallastreituröskun. Segir Petrína að of mikið sé um ekki sé tekið tillit til aðstæðna barna og þess sem þau þurfa að ganga í gegnum heldur séu þau meðhöndluð eins og eylönd.

Í kvöldfréttum Stöðvar 2 var greint frá því að flestar tilkynningar til barnaverndar um að börn byggju við heimilisofbeldi kæmu frá lögreglu eða heilbrigðis- og skólastofnunum. Mikill hluti þessara mála myndi hins vegar enda með því að móður barnsins væri sent bréf þar sem bent væri á almenn úrræði og þar með væri málinu lokið að hálfu barnaverndar.